មន្ត្រីនគរបាលជាន់ខ្ពស់កម្ពុជា ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ នៃអគ្គស្នងការដ្ឋាននគរបាលជាតិ ក្រសួងមហាផ្ទៃបាននិយាយថា នៅដើមខែធ្នូ ឆ្នាំ២០១៨ នេះ កម្ពុជាបានដាក់សំណើសុំបត្យាប័ន ទៅសាធារណរដ្ឋប្រជាធិបតេយ្យប្រជាមានិតឡាវ ដើម្បីបញ្ជូនជនជាប់ចោទជនជាតិខ្មែរម្នាក់ មកផ្តន្ទាទោសនៅក្នុងយុត្តាធិការ នៃព្រះរាជាណាចក្រកម្ពុជា តាមដីកាបង្គាប់ឲ្យចាប់ខ្លួន លេខ៤២៧ ដ.ច.ន ចុះថ្ងៃទី១១ ខែកក្កដា ឆ្នាំ២០១៧ របស់សាលាដំបូងរាជធានីភ្នំពេញ ។
ជនជាប់ចោទ ហួត សុវណ្ណ គឺជាមេខ្លោងម្នាក់ នៅក្នុងប្រព័ន្ធឆបោកដ៏ធំដែលមានសមាសភាពមកពី «ក្រុមហ៊ុន EBC» «អង្គការ AIF» និង «សមាគមន៍ ICA» ។ ក្រុមហ៊ុន និងអង្គការទាំងនេះ តែងតែដើរឆបោកប្រជាពលរដ្ឋគ្រប់ទីកន្លែង ជាអាទិ៍បានឆបោកប្រជាពលរដ្ឋខ្មែរជាង៧ពាន់នាក់ អស់ទឹកប្រាក់ជាង៦០លានដុល្លារ មកពីខេត្តជាច្រើន នៅកម្ពុជាតាម រយៈការបញ្ចុះបញ្ចូលឲ្យដាក់ ប្រាក់វិនិយោគរួម ដោយជនល្មើសសន្យាថា នឹងផ្តល់មកវិញនូវអត្រាចំណេញខ្ពស់ ។
ឧត្តមសេនីយ៍ឯក បន្ថែមថា «សមត្ថកិច្ចជំនាញកំពុង បន្តស្រាវជ្រាវ និងស៊ើបអង្កេតស៊ីជម្រៅបន្ថែមទៀត ដើម្បីវែកមុខ និងនាំយកមេខ្លោងធំៗ និងដៃជើងរបស់ ក្រុមនេះមកផ្តន្ទាទោសតាមច្បាប់ ឲ្យខាងតែបាន ទោះជាត្រូវចំណាយពេលវេលាប៉ុណ្ណាក៏ដោយ» ។
ឧត្តមសេនីយ៍ឯក ឌី វិជ្ជាបញ្ជាក់ថា កម្ពុជាកំពុងជំរុញដំណើរការកិច្ចនីតិវិធី បត្យាប័នជាមួយឡាវ ក្នុងស្មារតីអ្នកជិតខាងល្អ។ ព្រោះសាធារណរដ្ឋប្រជាមានិតឡាវ និងព្រះរាជាណាចក្រកម្ពុជា បានចុះហត្ថលេខា លើសន្ធិសញ្ញាបត្យាប័ន ក្នុងឆ្នាំ១៩៩៩ ដែលសន្ធិសញ្ញានេះចូលជាធរមានឆ្នាំ២០០៥ ។ ទន្ទឹមគ្នានេះ ដែរក្នុងក្របខ័ណ្ឌប្រទេសអាស៊ានទាំង១០ ក៏មានសន្ធិសញ្ញាស្តីពីជំនួយផ្នែកច្បាប់ទៅវិញទៅមកក្នុងរឿង ព្រហ្មទណ្ឌផងដែរ ។
សូមជម្រាបផងដែរថា ពាក់ព័ន្ធនឹងចំណាត់ការផ្លូវច្បាប់ចំពោះអង្គការ AIF សមាគម ICA ក្រុមហ៊ុន EBC និងបុគ្គលពាក់ព័ន្ធ ក្នុងករណីប្រតិបត្តិការគ្មានការអនុញ្ញាតក្នុងវិស័យមូលបត្រ ឆបោកប្រជាពលរដ្ឋសរុបជាទឹកប្រាក់ជាង៦០លានដុល្លារនោះ ជារឿងឆបោកទ្រង់ទ្រាយធំ និងជាប្រព័ន្ធមួយ នៅក្នុងប្រទេសកម្ពុជា ដែលធ្វើឲ្យប្រជាពលរដ្ឋជិត៨ពាន់នាក់ ក្នុង១១រាជធានី-ខេត្ត បានចាញ់បោកក្រុមអង្គការចំនួន២ និងក្រុមហ៊ុន១ ក្រោមរូបភាពថា យកលុយទៅដាក់នឹងបានថ្លៃការប្រាក់ខ្ពស់ ប្រចាំខែ ប៉ុន្តែតាមការពិត នៅពេលយកលុយដាក់ហើយ គឺបានថ្លៃការស៊ីពី២ទៅ៣ខែប៉ុណ្ណោះ លុះខែបន្ទាប់មិនទទួលបានការ ព្រមទាំងអស់លុយដើម ទៀតផង ។
ប្រជាពលរដ្ឋចំនួន៧,៤៣០នាក់ នៅតាមបណ្តាខេត្តផ្សេងៗ ត្រូវបានគេឆបោកអស់ទឹកប្រាក់សរុប៦០លានដុល្លារអាមេរិក ត្រូវបានប៉ាន់ស្មាន តែតាមរយៈជនរងគ្រោះដែលបានដាក់ពាក្យបណ្តឹង ដែលម្នាក់ៗ បានខាតបង់ទឹកប្រាក់ជាមធ្យម៨,០០០ដុល្លារ តាមរយៈការបញ្ចុះបញ្ចូលឲ្យដាក់ប្រាក់វិនិយោគរួម ដោយក្រុមជនល្មើស បានសន្យាថា នឹងផ្តល់មកវិញនូវអត្រាចំណេញខ្ពស់ (ប្រមាណជា១០ភាគរយ) នេះបើយោងតាមការបញ្ជាក់ពីមន្ត្រីជាន់ខ្ពស់នៃក្រសួងមហាផ្ទៃ នៅក្នុងសន្និសីទកាសែត នាព្រឹកថ្ងៃទី៣០ ខែឧសភា ឆ្នាំ២០១៧ ។
បើតាមលោក ងី ច័ន្ទផល រដ្ឋលេខាធិការក្រសួងមហាផ្ទៃ បានលើកឡើងថា តាមការប៉ាន់ស្មានបឋម មានប្រជាជនប្រមាណជាង៥ម៉ឺននាក់ រងគ្រោះក្នុងអំពើឆបោកនេះ ដូច្នេះប្រសិនបើជនរងគ្រោះទាំងអស់បានដាក់ពាក្យបណ្តឹង ទឹកប្រាក់នៃការខាតបង់ទៅលើអំពើឆបោកនេះ អាចមានចំនួនសរុបឡើងដល់ ប្រមាណជា៤០០លានដុល្លារ ឯណោះ ។
លោក ងី ចន្ទ្រផល បានបញ្ជាក់ថា «ថវិកាដែលយកមកបូកសរុប ទៅខ្ទង់៦០លានដុល្លារអាមេរិក គឺម្នាក់ៗស្មើនឹងជិត៨ពាន់ដុល្លារនេះ គិតជាមធ្យម។ ក្រុមនេះមានបំណងធ្វើឲ្យមានហានិភ័យ ក្នុងសង្គម និងបង្កឲ្យមានបញ្ហាសេដ្ឋកិច្ចក្នុងប្រទេសកម្ពុជា ព្រោះមានអ្នកខ្លះដាក់លុយទៅ១ពាន់ដុល្លារឃើញ តួលេខកើនឡើង ក៏ដាក់លុយបន្ថែមទៀត រហូតមានអ្នកខ្លះលក់ដី និងលក់ផ្ទះជាដើម ដើម្បីបានលុយច្រើនពី ក្រុមហ៊ុនទាំងនោះមកវិញ» ។
លោក ងី ច័ន្ទផល ក៏បានបង្ហាញអត្តសញ្ញាណស្ថាប័នដែលធ្វើការឆបោក ដែលរួមមានអង្គការ AIF សមាគម ICA ក្រុមហ៊ុន EBC ដែលសុទ្ធសឹងជាស្ថាប័នគ្មានសកម្មភាពច្បាស់លាស់ និងមិនមានអជ្ញាប័ណ្ណត្រឹមត្រូវ ។ លោករដ្ឋលេខាធិការក្រសួងមហាផ្ទៃ បានបញ្ជាក់ថា អជ្ញាធរពាក់ព័ន្ធក៏បានបង្ហាញអត្តសញ្ញាណជនល្មើសក្នុងករណីឆបោកនេះ ហើយកំពុងតាមចាប់ខ្លួនជនទាំងនោះ ផងដែរ ។
ក្រសួងមហាផ្ទៃនឹងចាត់ការផ្លូវច្បាប់ ចំពោះអង្គការមូលនិធិអភិវឌ្ឍន៍អាស៊ីអាគ្នេយ៍ (AIF) ដែលមានឈ្មោះហួត សុវណ្ណ ភេទប្រុស អាយុ៣១ឆ្នាំ ជាប្រធាន ស្នាក់នៅផ្ទះលេខ៩៩ ផ្លូវលេខ៣៣៦ សង្កាត់បឹងសាឡាង ខណ្ឌទួលគោក ។ សមាគមអ្នកប្រឹក្សាយោបល់វិនិយោគ (ICA) ដែលមានឈ្មោះជិហ្គោ សាលី ភេទប្រុស អាយុ៣៣ឆ្នាំ ជាប្រធាន ស្នាក់នៅផ្ទះលេខ១១៤ហាសផ្លូវលេខ៥៥ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ និងក្រុមហ៊ុន Empire Big Capital Limited (EBC) ដែលមានឈ្មោះTan Tze Chin ហៅSean Tan ជនជាតិម៉ាឡេស៊ី ភេទប្រុស អាយុ៣៣ឆ្នាំ កាន់លិខិតឆ្លងដែនលេខA28455291 ជាប្រធានក្រុមហ៊ុន និងឈ្មោះឡុង សម្បត្តិ ភេទប្រុស អាយុ៣១ឆ្នាំ ទីលំនៅភូមិត្រពាំងវិហារ ឃុំជើងគួន ស្រុកសំរោង ខេត្តតាកែវ មានផ្ទះលេខ១៦៤ ផ្លូវ១៩ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ចំណែកឯ គណៈកម្មការមូលបត្រកម្ពុជា ដែលមានតួនាទីគ្រប់គ្រង និងត្រួតពិនិត្យលើរាល់សកម្មភាពពាក់ព័ន្ធ និងវិស័យមូលបត្រនៅកម្ពុជា បានបញ្ជាក់ថា គណៈកម្មការមូលបត្រកម្ពុជា មិនទាន់ផ្តល់ការអនុញ្ញាតឬអាជ្ញាប័ណ្ណឲ្យក្រុមហ៊ុនណាមួយ ធ្វើអាជីវកម្មប្រភេទនេះទេកន្លងមក មានក្រុមហ៊ុនមួយចំនួនបានលួចធ្វើអាជីវកម្មដោយយកឈ្មោះរបៀបវិនិយោគរួមគ្នា ដើម្បីប្រមូលលុយពីសាធារណជនដោយអះអាងថា ជាក្រុមហ៊ុនសាខាពីអន្តរជាតិតែភាគច្រើនមិនបានយកទៅវិនិយោគពិតប្រាកដនោះឡើយ (បោកប្រាស់)។
សូមបញ្ជាក់ថា ប្រជាពលរដ្ឋរាប់ពាន់នាក់បានមកពីរាជធានីភ្នំពេញ និងបណ្ដាខេត្តនានា បានដាក់ញ្ញតិសុំអន្តរាគមន៍ពីស្ថាប័នតុលាការ រដ្ឋសភា និងក្រសួងយុត្តិធម៌ ដើម្បីទទួលបានដំណោះស្រាយលើរឿងដែលពួកគាត់ចោទថា ក្រុមហ៊ុន Empire Big Capital Limited (EBC) ដែលមានមូលដ្ឋាននៅហុងកុង បានឃុបឃិតជាមួយអង្គការពីរទៀតមាន អង្គការមូលនិធិអភិវឌ្ឍន៍អាស៊ីអាគ្នេយ៍ (AIF) និងសមាគមអ្នកប្រឹក្សាយោបលវិនិយោគ (ICA) បានឆបោកប្រាក់ដើមទុន សរុប៤៦លានដុល្លាររបស់ពលរដ្ឋជាង៥ពាន់គ្រួសារ ។
បើតាមប្រជាពលរដ្ឋដែលចូលរួមដាក់ញ្ញត្តិលើករណីខាងលើនេះបានឲ្យដឹង ពួកគាត់បានចាញ់បោកក្រុមហ៊ុន EBC ដែលបានប្រមូលប្រាក់ដើមទុនរបស់ពួកគាត់ចាប់តាំងពីឆ្នាំ២០១៣មក ដោយសន្យាថា នឹងផ្ដល់ផលចំណេញជាភាគលាភ១០ភាគរយក្នុងមួយខែ ហើយរយៈពេល១៨ខែ ក្រុមហ៊ុននឹងឲ្យប្រាក់ដើមត្រឡប់ទៅពលរដ្ឋជាអ្នកវិនិយោគវិញ ។ ហើយប្រតិបត្តិការរបស់ក្រុមហ៊ុននេះ មានការសហការជាអង្គការទាំងពីខាងលើ ដែលផ្សព្វផ្សាយ កៀងគរប្រជាពលរដ្ឋឲ្យដាក់ទុនលើការវិនិយោគនេះ ។
ការដែលប្រជាពលរដ្ឋហ៊ានដាក់ទុនជាមួយក្រុមហ៊ុន EBC ដោយសារតែពលរដ្ឋជឿលើអង្គការ AIF និងសមាគម ICA ។ «ពលរដ្ឋអត់មានអ្នកណាស្គាល់ក្រុមហ៊ុន EBC នៅហុងកុងនោះទេ គឺ AIF និង ICA ជាអ្នកឈរកណ្ដាល ។ អង្គការនេះពីរនេះ ប្រមូលប្រាក់ពីពលរដ្ឋ ហើយរុញចូលគម្រោងរបស់ក្រុមហ៊ុន EBC ។ ក្រុមហ៊ុននេះបានឆបោកប្រាក់ពលរដ្ឋរាប់ម៉ឺននាក់ឯណោះ ។
ការដែលក្រុមហ៊ុនបានផ្ដល់ភាគលាភក្នុងគ្រាដំបូងៗជូនដល់អ្នកវិនិយោគ បានទាក់ទាញឲ្យអ្នកផ្សេងៗ ទៀតច្រើនឡើងៗ ចូលរួមក្នុងគម្រោងវិនិយោគនេះ ហើយក្រុមហ៊ុនឈប់ផ្ដល់ភាគលាភចាប់ពីខែកក្កដា ឆ្នាំ២០១៥ ដល់អ្នកវិនិយោគ ។ តាមរយៈអង្គការទាំងពីរខាងលើបានសន្យាម្ដងហើយម្ដងទៀតថា នឹងបង្វិលប្រាក់ត្រឡប់ជូនអ្នកវិនិយោគវិញ ។ ទន្ទឹមនឹងរង់ចាំការសន្យានេះ អ្នកមួយចំនួនបានចងជាក្រុមហើយធ្លាប់ប្ដឹងទៅស្ថាប័នរបស់រដ្ឋាភិបាល រហូតមកដល់ពេលនេះ ៕
0 Comments
Post a Comment