អតីតពិធីករ ឡាយអ៊ិន និងបក្ខពួក៣នាក់ទៀត ត្រូវបាននគរបាលនៃមន្ទីរប្រឆាំងគ្រឿងញៀន”ក៦” ចាប់ខ្លួនពាក់ព័ន្ធករណីជួញដូរគ្រឿងញៀនយ៉ាងសកម្មនៅមុខមជ្ឈមណ្ឌលកំសាន្តរ៉ុក ។
ក្រោយបាត់មុខ ពីសិល្បៈអស់រយៈពេលជាយូរ អតីតពិធីករឆ្នើម ប្រចាំស្ថានីយ៍ទូរទស្សន៍ CTN លោក ហែម បូរិទ្ធ ហៅ ឡាយ អិន ស្រាប់តែថ្មីៗនេះ បែរជាសម្ងំ រត់ពន្ធគ្រឿងញៀន ជាង១គីឡូក្រាម និងកាន់កាប់អាវុធខុសច្បាប់ ត្រូវមន្ទីរប្រឆាំងគ្រឿងញៀន ឃាត់ខ្លួន រួមជាមួយមនុស្ស ៣នាក់ទៀត នៅថ្ងៃទី២១ ខែធ្នូ ឆ្នាំ២០១៨នេះ។
តាមរបាយការណ៍របស់មន្ទីរប្រឆាំងគ្រឿងញៀន ការចាប់ខ្លួនជនសង្ស័យជួញដូរគ្រឿងញៀនទាំង៤នាក់នេះ បានធ្វើឡើងនៅរាត្រីថ្ងៃទី១៨ពីម៉ោង២១និង១០នាទី ដល់ម៉ោង២និង៣០នាទី ឈានចូលថ្ងៃទី១៩ ខែធ្នូ ឆ្នាំ២០១៨ កម្លាំងជំនាញ”ក៦” នៃមន្ទីរប្រឆាំងគ្រឿងញៀន បានចុះប្រតិបត្តិការនៅចំណុចមុខមជ្ឈណ្ឌលកំសាន្តរ៉ុក ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយបានឃាត់ខ្លួនមុខសញ្ញាជួញដូរគ្រឿងញៀនយ៉ាងសកម្ម ចំនួន៤នាក់ (ម្នាក់អតីតៈពិធីករ) និងគ្រឿងញៀន ជាង ១kg ត្រូវសមត្ថកិច្ចមន្ទីរប្រឆាំងគ្រឿងញៀនបង្ក្រាប។
តាមរបាយការណ៍មន្ទីរប្រឆាំងគ្រឿងញៀន បានឲ្យដឹងទៀតថា ក្នុងការឃាត់ខ្លួន DJ ឡាយ អិន និងបក្ខពួក សរុបគ្នា៤នាក់ (ស្រី១នាក់) ត្រូវបានសមត្ថកិច្ច ដកហូតបាន ១-ថ្នាំមេតំហ្វេតាមីន(ICE)ទម្ងន់៣៧៤.៣៩ក្រាម ២-សារធាតុញៀន ប្រភេទអ៊ិចស្តាស៊ី ចំនួន១៥៦២គ្រាប់ ស្មើទម្ងន់ និង៦០៩.៣៣ក្រាម (សរុបជាង១គីឡូក្រាម) ៣-អាវុធខ្លី១ដើម (ឡុក) ៤-ជញ្ជីងថ្លឹងគ្រឿងញៀនធំ ១គ្រឿង និងតូច២គ្រឿង ។
ការចាប់ខ្លួនជនសង្ស័យទាំង៤នាក់នេះ ធ្វើឡើងនៅ៣ចំណុចផ្សេងគ្នា ដោយនៅចំណុចទី១ ឃាត់ខ្លួនជនសង្ស័យម្នាក់(ប្រុស)នៅមុខមជ្ឈមណ្ឌលកំសាន្តរ៉ុក និងចាប់យកវត្ថុតាងរួមមានថ្នាំញៀនប្រភេទមេតំហ្វេតាមីន ទម្ងន់១៥០ក្រាម, និងនៅចំណុចទី២ នៅមុខក្លិបអ៊ឹមផាយអឺ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយបានឃាត់ជនសង្ស័យម្នាក់(ស្រី) ។
រីឯនៅចំណុច ៖ នៅក្នុងមជ្ឈមណ្ឌលរ៉ុក បន្ទប់លេខ១០៨ ក្នុងសង្កាត់ទន្លេបាសាក់ ខណ្ឌចំការមន ដោយឃាត់ជនសង្ស័យ២នាក់(ប្រុស) និងចាប់យកវត្ថុតាងរួមមាន ថ្នាំញៀនប្រភេទមេតំហ្វេតាមីនទម្ងន់២២៤.៣៩ក្រាម និងអិចស្តាស៊ី១៥៦២គ្រាប់ ទម្ងន់៦០៩.៣៣ក្រាម ។
តាមរបាយការណ៍មន្ទីរប្រឆាំងគ្រឿងញៀនបានឲ្យដឹងទៀតថា ជនសង្ស័យទាំង៤នាក់រួមមាន ៖ ១.ឈ្មោះ ហែម បូរិទ្ធ (ហៅ ឡាយ អិន អតីតពិធីករ) ភេទប្រុស , ២.ឈ្មោះ អ៊ិន សុខន ភេទប្រុស , ៣.ឈ្មោះ ម៉ៅ ស៊ីណា ភេទស្រី និង ទី៤.ឈ្មោះ ស៊ិន សម្ផស្ស ភេទប្រុស ។
តាមរបាយការណ៍បានបញ្ជាក់ទៀតថា ជនសង្ស័យឈ្មោះ ស៊ិន សម្ផស្ស ឬ ស៊ិន សំភ័ស្ត ធ្លាប់ជាប់ពន្ធនាគារ១ដង ពាក់ព័ន្ធបទល្មើសគ្រឿងញៀន និងជាមេខ្លោង ក្នុងករណីខាងលើ ៕
ប្រភពអត្ថបទ៖ នគរបាលជាតិ
0 Comments
Post a Comment