សេចក្តីរាយការណ៍ឱ្យដឹងថា បុរសជាកូនអកត្តញ្ញូម្នាក់ ត្រូវនគរបាលចាប់ខ្លួនវាយខ្នោះបន្ទាប់ពីផឹកស្រាស្រវឹង លុះឃើញម្តាយកំពុងដេកលើគ្រែ ក៏ចាប់គាត់ទាញម្តាយទម្លាក់ រួចវាយសំពងអូសទៅទម្លាក់ទឹកប៉ុនប៉ងសម្លាប់គាត់ថែមទៀត ដែលហេតុការណ៍ដ៏ព្រៃផ្សៃនេះ កើតឡើងកាលពីវេលាម៉ោង១១ និង១០នាទីយប់ថ្ងៃទី២១ ធ្នូ ស្ថិតនៅចំណុចភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ។
សេចក្តីរាយការណ៍បន្តថា ជនសង្ស័យឈ្មោះពិន ដាវីន( ហៅសិន) អាយុ៣៤ឆ្នាំ មុខរបរមិនពិតប្រាកដ រស់នៅភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ។ រីឯម្តាយរងគ្រោះឈ្មោះអិន សាមោល អាយុ៦៧ឆ្នាំ (ពិការភ្នែក) រស់នៅភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ។
សាក្សីបានឱ្យដឹងថា មុនពេលកើតហេតុ ស្ត្រីរងគ្រោះជាម្តាយកំពុងតែដេកនៅលើគ្រែក្នុងផ្ទះ ស្រាប់តែជនសង្ស័យជាកូននេះ ត្រឡប់ពីផឹកស្រាវិញមិនដឹងមានកំហឹងរឿងអ្វី ក៏ស្ទុះទៅទាញម្តាយទំលាក់ពីលើគ្រែហើយដាល់ចំឆ្អឹងជំនីរចំនួន២ដៃ ។ បន្ទាប់មក ជនសង្ស័យបានចាប់អូសម្តាយយកទៅទំលាក់ក្នុងទឹកប្រឡាយខាងក្រោយផ្ទះ រួចចាប់អូសមកលើគោកវិញ និងវាយទៅម្តាយបន្ថែមទៀត ។ ក្រោយមក ជនសង្ស័យទុកម្តាយចោល រួចក៏ដើរចេញពីផ្ទះទៅបាត់ ។
លុះនៅព្រឹកថ្ងៃទី២២ ធ្នូ នេះ ទើបម្តាយបានមកដាក់ពាក្យបណ្តឹងនៅប៉ុស្តិ៍រដ្ឋបាលឃុំអន្លង់រមៀត ដើម្បីចាត់ការតាមច្បាប់ ។ គួរបញ្ជាក់ថា ជនសង្ស័យរូបនេះ ធ្លាប់ជាប់ពន្ធនាគារ៤លើកមកហើយពីបទហិង្សា៕
ប្រភព : កោះសន្តិភាព
0 Comments
Post a Comment